NoordNoordOost - Wi dreiht up!

An'n 5. November 2021 hebbt Plattdüütschfrünnen in de Lauenborger Heinrich-Osterwold-Halle en besünnern Avend belevt.

Bi NoordNoordOost hebbt dree Künstler opdreiht, de een anners nich tosamenbringen deit. Ut Kiel is de Rapper LPP143 kamen. Man mutt bannig de Ohren spitzen, wenn he sien Rap-Version vun de Slacht bi Hemmingstedt vun Klaus Groth presenteert. De Hip-Hopper hett dat Publikum mit sien charmante Oort un den Inhalt vun sien Stücken dorvun övertüügt, dat de ole Spraak mit de modern Musik wunnerbor tosamen passen deit.

Ut't Emsland weer de Poetry-Slammerin Gesche Gloystein kamen. Se schrifft Texten mit veel Wiitz, de faken bannig kritisch sünd. Aktuelle Themen, so as de Klimawannel un de Konsum vun de Lüüd hüüttodaags, bringt se klook ünner de Lüüd. De Gäst hebbt ehr Vördrääg mit langen Bifall lohnt.

Benjamin Nolze ut Meckelnborg hett de Gäst na de Paus mit tradischonell Stücken un ok mit Leder vun sien Vader Kurt Nolze mitnummen op en Reis dör sien Heimat. Döntjes dröffen dorbi ok nich fehlen.

De Eerstoplaag vun NoordNoordOost hett sik as runde Saak dorstellt. Dat Team vun de Veranstalters üm Thorsten Börnsen, Nedderdüütschzentrum för Holsteen, Anne Boll vun'n Heimatverband Mecklenburg-Vorpommern un Inga Seba-Eichert, Lümborgsche Landschapsverband, weren sik eenig: "Ok in 2022 dreiht wi weer tosamen op bi NoordNoordOost!"

NoordNoordOost

NoordNoordOost is en Projekt vun dree Organisatschonen ut dree Bunneslänner. De Richten NoordNoordOost wiest uns, wokeen dor mitwarken deit. De Lümborgsche Landschapsverband e.V., dat Zentrum för Nedderdüütsch in Holsteen un de Heimatverband Mecklenburg-Vorpommern e.V. müchen tosamen von Tiet to Tiet Plattdüütsch-Veranstalten op den Weg bringen un Plattdüütsch-Frünnen över de Grenzen tosamen bringen.

Kooperationspartner: