2. Workshop "Platt in'n Kinnergoorn" am 24. Oktober 2018 in Munster

"Wie maakt mit... Platt in'n Kinnergoorn", na dit Motto hebbt sik Optrecker op Inladen vun den Lümborgschen Landschapsverband in Munster drapen. Mit bannig veel Musik, Fingerspelen un Leder op Plattdüütsch geev dat för de Deelnehmers veel Anregen för de Arbeit in de Kitas. Manch een Deelnehmer hett noch nich faken in de Kita Platt snackt. Dor is dat en grote Help, wenn een sik uttuuschen kann mit Lüüd, de all lang mit de Kita-Kinner Platt spreekt.

Dat Platt vun Harten kummt un Hochdüütsch ut'n Kopp, dat is nich nee! In en Vördrag hebbt de Deelnehmers Informatschon kregen, wo wichtig dat is, dat sik Kinner freuh mit ünnerscheedlich Spraaken utenanner sett. Bannig wichtig is, dat en Optrecker de Kinner in jüst de Spraak afholen kann, de vun Harten kummt. Bi uns is dat nu mal dat Plattdüütsche!

De Fortbillen hett stattfunnen in de Stadtbökeree Munster un deshalb dröffen plattdüütsche Billerböker ok nich fehlen. De Deelnehmers hebbt doröver snackt, wo se düsse Böker in de Arbeit inboen un mit de Kinner in't Vertellen kommen künnt.

In en grote Runn geev dat för all de Kitas, de to'n eersten Mal dorbi ween sünd, de gele Plakette "Wi maakt mit..." vun'n Lümborgschen Landschapsverband. Nu kann jeedeen sehn, dat in düsse Kitas ok Platt snackt warrt.

Plakette zur Auszeichnung/Kennzeichnung von Kindergärten mit plattdeutschen Angeboten im Verbandsgebiet des Lüneburgischen Landschaftsverbandes © Lüneburgischer Landschaftsverband, Entwurf Volker Butenschön

Der Plattdeutsch-Beauftragte des Heidekreises, Oskar Hein, mit Gerlinde Schmidt-Hood vom niedersächsischen Institut für frühkindliche Bildung und Entwicklung, der Musikpädagogin Marlene Bucher und der Referentin Claudia von Holten beim Workshop 2018 © Inga Seba-Eichert