19. Schoolmesterdag 2020 - Dit Johr is allens anners ween!

Dat is ganz anners ween. De persönlichen Kuntakte hebbt fehlt, Kaffee un Koken sowieso! Dor sünd sik de goot dörtig Deelnehmers an den "1. Schoolmesterdag online" enig. Aver enig sünd se sik ok, dat dat in negentig Minuten veel Informatschoon geven hett. Vun de Schoolbehöörd geev dat glieks tweemal Video-Gröten. Dezernentin Gabriele Scheel ut Lümborg kunn nich live dorbi ween un harr en Video schickt. De Beratersch för "Plattdüütsch in de School", Wiebke Erdtmann, harr mit ehr Klass en Harvst-Gedicht as Video-Botschaft trechmaakt. Butendem hett se verkloort, wo dat in Tieden vun Corona in de School löppt. Ideen för "Plattdüütsch in de Sekundarstufe" hebbt Heike Hiestermann un Margaretha Stumpenhusen vörstellt. Beide arbeid as Beratersche för de Schoolbehöörd, so as Andrea Schwarz ok. Se hett över den Lesewettstriet 2021 snackt, de wegen Corona nich so stattfinnen kann, as een dat kennen deit. Bannig Vergnögen harrn de Deelnehmers mit den Bidrag vun Heiko Frese. He hett dat Kinnerbook "Mammut Hansen" vörstellt. De Lümborgsche Landschapsverband hett mit Rike Henties, Plattdüütsch-Koordinatorsche ut den Landkreis Horborg, den Corona-Lockdown nutzt un Videos dreiht, wo een Anregen to'n Sülvstmaken vun Seep or to'n Neihen kriggt. En anner Projekt vun Lümborgschen Landschapsverband mutt nu ok online stattfinnen. Dat gifft en Fortbillen för "Actionbound". Dor künnt Lüüd mitmaken, de Medienpädagogik un Plattdüütsch tohopen bringen wüllt. Rut kummt en Rallye op Platt, de een mit dat Smartphone speelen kann. Den Afsluss möök Anne Denecke, Geschäftsführersche vun den Lümborgschen Landschapsverband. Se hett wohl dat seggt, wat al de Deelnehmers dacht hebbt: scheun, dat wi dat so maken kunnen aver nu freit wi uns op den Schoolmesterdag 2021, so as wi de Veranstalten kennen doot.